E el que tal estará este filme?

Aos que gustamos de ver bo cine sen sermos uns eruditos na materia, Cineuropa creounos sempre unha dúbida metafísica, que puxemos aquí no título. Como saber se un filme que se acaba de estrear nos vai prestar ou non? A crítica especializada non nos soluciona moito a vida neste sentido que digamos, en xeral. Daquela, só nos quedaba unha contrarreloxo coa axuda dos colegas: - Fuches ver Chímpriri-chímpiri de Jei Carballeira? Que tal? - Caralluda, pero o derradeiro pase é hoxe ás 7 e son as 7. - Ah, vale…

Isto acabou: Ifrit, Snob e Pawley alíanse nun blog para nos guiar en tempo real sobre os filmes da edición deste ano. Con eses tres perfís tan diversos e complementarios, e coñecéndoos como os coñecemos, a Rede gáñalle unha batalla máis á vida. Aquí.

Panxoliñas e vilancicos revisited

Do mesmo xeito ca no s. XVIII, os compositores de música popular que normalmente desenvolven o seu traballo en castelán bótanse a facer panxoliñas en galego. Daquela, nun estertor aínda por estudar da escola trobadoresca, facían casar nas letras galileo con galego, Galilea con Galicia e Ourense con Oriente, entre outras cousas. Hoxe, Nadadora e Apenino, destacados representantes galegos no pop estatal, fan algo semellante, e titúlano, respectivamente, Escoita, a neve cae arredor, versión do Happy Xmas de John e Yoko, e Panxoliña para Nuna.

A primeira xa se pode escoitar en streaming, na páxina d’A Regueifa. Agora só queda desexar persistencia e que as suban en mp3, eh?, non si?, ;-). E velaquí os rapaces do IES Leiras Pulpeiro de Lugo, que cantan as de toda a vida, para descargar.

d-fanzíns e blogs

Coa invención e expansión do fenómeno blog semellaba que o fanzín era un soporte de edición obsoleto e pertencente á mitoloxía pop e punk dos 80. Agora que, polo visto, o blog entra en horas baixas (que rápido todo, meu) abrochan vizosos os proxectos en papel. Citaremos tres namais, tanto pola súa actualidade coma pola calidade, e sobre todo pola posibilidade de os conseguir de balde, ben en pdf, ben nos bares: 300, Cadernos de cultura e derruba e -a3-. 

Expos na Rede

Hoxe inauguramos a sección de arte de cpg. O Faro de Vigo sacou hai algo máis dun mes esta reportaxe sobre a autoexposición dixital. Cita como exemplos destacados o proxecto Alg-a, polo que fala Berio Molina, que a cpg nos é moi querido pola cantidade de sons de avangarda que está subindo e que recollemos en Se descóbresque e en emepegués, Roberto González, pioneiro da autoexposición, Sara Sapetti, o ilustrador Javier Aguilera e Carme Nogueira. Nós engadimos os Aduaneiros sem fronteiras, a sección de Fotografía d’A Regueifa Plataforma, e o Proxecto Edición.

More

Podgalego

 

O costume de postear sons galegos, iniciado, que eu saiba, por Mariademallou en Casatlántica, polo programa e-music, de Cuac FM e polos Ouveos na noite de Zimmer103, hai xa ben máis de medio ano, está agromar pouco e pouco no blogmillo. Pouco despois destas primeiras mostras, nós, dende música pirateable en galego (emepegues.blogspot.com) comezamos a subir as edicións de Se descobres que a NASA che rouba os discos de cumbias, con algunha ca outra dificultade técnica. Hoxe en día temos en galego podcasts tan currados, por exemplo, coma as Chuzanews de Chuza.

Téndelos todos, e máis, en podgalego.org

More

Máis Alá

O portal Vieiros vén de pór en marcha un soportal de cultura ben interesante, Máis Alá. Polos contidos e polo espírito é altamente recomendable para os afectos da Cultura Pirateable en Galego, e xa figura entre as fontes obrigadas deste blog. Incorpora música e vídeo, un paso adiante imprescindible nun medio dixital, e o formato lembra vivamente o das bitácoras. Inclúe unha porcentaxe moi alta de contidos libres, e a imaxe do cabezallo fala por si soa.

Os 100 tolos e Notodofilmfest V

 

Hoxe traémosvos no mesmo artigo dous festivais de curtas a través da Rede: a V edición do Notodofilmfest, festival de cine comprimido, e Os 100 tolos, “o concurso de vídeos pola Internet do que todo o mundo fala”. Nos dous casos, as obras pódense visualizar e mesmo descargar de balde. Por certo, que non había estar nada mal termos gañador/a en galego: o Notodofilmfest repártevos 35.000 € en premios.

Arraianos de balde

 

 

A revista Arraianos, feita dende Celanova, ten os seus exemplares para libre descarga no seu sitio. O máis recente, un monográfico sobre Celso Emilio Ferreiro, que logo se ha subir en pdf, ten unha calidade digna de mención: inclúe textos inéditos do poeta e mostras da súa correspondencia, ben reveladora e mesmo polémica, tamén inéditas até agora. Este número foi xa presentado en Celanova e Compostela. En datas próximas presentarase en Vigo.

More

O galego dende Portugal

  

Vía Invando Vagalumes, e Chuza atopamos esta interesante reportaxe sobre o galego da TV portuguesa. Sen dúbida, o camiño cara a unha reintegración plena entre o galego e o portugués ten que pasar polo coñecemento común e pola eliminación de prexuízos lingüísticos que, por veces, semellan máis fortes no país veciño ca en Galiza.

E viceversa.

Puta Miseria despídese

 

O grupazo vigués de punk rock-teatro Puta Miseria despídese do escenario. Foi o sábado, cun konzerto multitudinario no Anoeta de Vigo, onde, xunto c’O Leo i Arremecághona!!!, tocaron o seu repertorio enteiriño e mesmo fixeron un bis do seu himno Facha Kabrón. Son sete anos levando por Galicia o seu concepto do punk como espectáculo multimerda. Quédanos o seu material no sitio web do grupo e o resto dos proxectos dos seus membros: Essenzia de Lapo, o Centro Social A formiga, etc.

Tendes emepegués deles na nosa emepegueca, no primeiro botón da barra da dereita.