Por fin botan Apologhit!

Logo do risco dunha máis ca probable fusión do concurso da canción galega do verán co das panxoliñas do Nadal, os directivos do-ente(s) decidiron emitir mañá (xoves) á 1:30 da madrugada o programa especial de Apologhit, que se gravara na LP45 de Ordes. O programa, amais dunha iniciativa de normalización cultural e lingüística sen precedentes, estivo dende o comezo comprometido coas Creative Commons: toda a súa música se pode descargar aquí.

Galicia Caníbal no “Billyboard”

Galicia Caníbal, d’Os Resentidos, que podedes baixar aquí, entre outras moitas, ocupa o posto 175 nunha lista de 200 temas que sacou a Rolling Stone para escoller a mellor canción estatal de pop-rock. É o único tema en galego que figura. Eu a estes recomendáballes dar unha voltiña por aquí.

Farruco Remixed

Ultra_marinho remestura o Farruco nun tema bailable que lle chaman Sabichón do carallo, e que non ten nada que lles envexar aos clásicos do xénero: Quién me pone la pierna encima?, sobre Jorge, o personaxe máis logrado que dera o Gran Hermano, ou a oda a Arsenio, de Sushi Loop, Arsenio is in da’house.

Que pringao

O director de Relacións Institucionais da SGAE dis que a pirataría na Rede ten os días contados. Eu, dende os tempos en que un colega e mais eu pirateabamos o Kill ‘em All de Metallica con dous radiocasés un enfronte do outro cunha toalla por riba, e tragábamos o disco enteiriño sen alentar para que non saíse gravada a respiración, até hoxe que cun clic descargo o disco do Hevi con Malandromeda no meu mp3, nunca vin este fulano diante. Sen contar coas novas músicas que se gravan facéndolle un corte de mangas ao cantante d’Os Canarios.

Vigo, a cidade esquecida

Sempre se dixo de Vigo que non é unha cidade turística. Mesmo collemos unha periódica e cíclica perrencha pan-olívica cada vez que sae nas guías de viaxes que Vigo é unha puta merda. Algo terá que ver que a zona vella non se dea restaurado e que non se lle faga nin puto caso á arquitectura histórica da cidade, cando non a derruban directamente, como se conta neste blog e no documental Vigo, a cidade perdida.

Andar21

E falamos hoxe tamén de Andar 21, niño absolutamente preponderante da poesía libre e nova na Rede. Á parte dos sucesivos números da revista literaria dixital, podedes descargar novidades que mandan os autores galegos e traducións para o galego-portugués da literatura mundial. Hai que destacar a sección de poesía visual, de onde tiramos a imaxe de Mann, da autoría do colectivo Niño de Metralladoras, Poesía de Combate.

Zimmer103

A Regueifa Plataforma saca o debut dun do francotirador máis certeiro da música dixital, tanto na acepción electrónica coma na que remite á Rede. Zimmer 103, logo de presentar ao Apologhit a cántiga estival A min non tb’s, estrea cinco temas en galego en Hatt Trick, a súa estrea. Cómpre tamén destacar o seu labor como precursor do podcast en galego, do que xa falamos, cos seus Ouveos na Noite.

O Xabarín no You Tube!

Vía Dogsado Beta soubemos que varios vídeos das pezas do Xabarín xa se poden ver de balde na Rede, grazas a TellaCeibe, que o subiu ao You Tube. Hits da nosa infancia-adolescencia como Just Girls, das Amarguiñas (que sería delas?), ou Tá-se bem na Rádio, de Kussondulola, a primeira noción do reagge en galego que tivemos por estes lares. No Tubo podemos topar tamén, como non, o himno absoluto da nosa adolescencia de rockeiros parrulos, o Que jallu é!, dos Heredeiros, dos que -por certo- hai un díxome-díxome de que se van xuntar outra volta.

Do domínio público

- O Governo Federal do Brasil vén de pór ao alcance dos utentes unha biblioteca virtual de contidos en galego-portugués do Brasil, ou brasileiro, que se poden baixar de balde. Permite a descarga de imaxes, textos, vídeos e son, Domínio Público. E digo eu, entre a dixitalización masiva de Google e a Biblioteca Virtual Galega, non podería haber por aí unha terceira vía neste sentido, apoiada pola Xunta.

- Ai, mi ma, lo que tal dijo!

Vídeopoemas

E metidos xa de cheo na fin dunha semana en que os novos soportes para a poesía estiveron moi presentes, deixámosvos aquí ligazóns a dúas das propostas máis interesentas neste sentido en galego. A primeira é da precursora Mariademallou, de Casatlantica. As segundas, máis recentes, de Sara Jess, n’O Cartafol de Silencios. Quen dixo que a poesía non se podía ver? Quen que non escoitar? Poetry’s in the air.