Cinema na rúa

O Cinema seica abandonou a rúa, polo menos o cinema convencional. Non así o cinema documental, o vídeo dixital, etc. O Cineclube de Compostela e a Casa Encantada alíanse para devolver os filmes ás prazas. En xullo, na praza do Pan (tm. de Cervantes).

Piratas!

 As Brigadas de Intervención Rápida George Grosz loita contra a mercantilización da cultura con palabras. E é no marco de denuncia da senteza que o Cineclube de Compostela vén de padecer, que lle dá a razón da forza, máis unha vez, á parte de vil metal que hai en todo produto artístico, e que afoga un chisco máis a propia obra, en vez de favorecela.

Velaquí, en libre descarga, todo o contrario: unha obra artística de gran calidade completamente gratuíta.

Vigo, a cidade esquecida

Sempre se dixo de Vigo que non é unha cidade turística. Mesmo collemos unha periódica e cíclica perrencha pan-olívica cada vez que sae nas guías de viaxes que Vigo é unha puta merda. Algo terá que ver que a zona vella non se dea restaurado e que non se lle faga nin puto caso á arquitectura histórica da cidade, cando non a derruban directamente, como se conta neste blog e no documental Vigo, a cidade perdida.

Vídeopoemas

 

E metidos xa de cheo na fin dunha semana en que os novos soportes para a poesía estiveron moi presentes, deixámosvos aquí ligazóns a dúas das propostas máis interesentas neste sentido en galego. A primeira é da precursora Mariademallou, de Casatlantica. As segundas, máis recentes, de Sara Jess, n’O Cartafol de Silencios. Quen dixo que a poesía non se podía ver? Quen que non escoitar? Poetry’s in the air.

E el que tal estará este filme?

Aos que gustamos de ver bo cine sen sermos uns eruditos na materia, Cineuropa creounos sempre unha dúbida metafísica, que puxemos aquí no título. Como saber se un filme que se acaba de estrear nos vai prestar ou non? A crítica especializada non nos soluciona moito a vida neste sentido que digamos, en xeral. Daquela, só nos quedaba unha contrarreloxo coa axuda dos colegas: - Fuches ver Chímpriri-chímpiri de Jei Carballeira? Que tal? - Caralluda, pero o derradeiro pase é hoxe ás 7 e son as 7. - Ah, vale…

Isto acabou: Ifrit, Snob e Pawley alíanse nun blog para nos guiar en tempo real sobre os filmes da edición deste ano. Con eses tres perfís tan diversos e complementarios, e coñecéndoos como os coñecemos, a Rede gáñalle unha batalla máis á vida. Aquí.

Máis Alá

O portal Vieiros vén de pór en marcha un soportal de cultura ben interesante, Máis Alá. Polos contidos e polo espírito é altamente recomendable para os afectos da Cultura Pirateable en Galego, e xa figura entre as fontes obrigadas deste blog. Incorpora música e vídeo, un paso adiante imprescindible nun medio dixital, e o formato lembra vivamente o das bitácoras. Inclúe unha porcentaxe moi alta de contidos libres, e a imaxe do cabezallo fala por si soa.

Os 100 tolos e Notodofilmfest V

 

Hoxe traémosvos no mesmo artigo dous festivais de curtas a través da Rede: a V edición do Notodofilmfest, festival de cine comprimido, e Os 100 tolos, “o concurso de vídeos pola Internet do que todo o mundo fala”. Nos dous casos, as obras pódense visualizar e mesmo descargar de balde. Por certo, que non había estar nada mal termos gañador/a en galego: o Notodofilmfest repártevos 35.000 € en premios.

As Cidades do Cineclube

Xa é sabido que o Cineclube de Compostela ten en marcha o ciclo Cidades. Pero non contentes con ofrecer os seus filmes de balde (ben, preferiblemente pagando un abono-axuda de 1 €), veñen de subir á Rede o abraiante dossier do ciclo, que custa 1 € en papel (gratis para os socios) e que podedes descargar de balde aquí. Textos sobre as cidades de Michel de Certeau, Mike Davis, etc., e unha entrevista con David Harvey. Como remate, un texto de Jean-Luc Godard sobre a súa traxectoria.

More