Tractors n’A Regueifa

A Regueifa Plataforma continúa engrosando o seu xa rebordante catálogo para o noso gozo total. Desta volta, a sección de vellas músicas gaña entradas coa demo dos desaparecidos The Tractors, banda de punk de Ourense de finais do século pasado (que raro queda isto falando de punk). Kaña da boa na onda Exploited, pero por suposto sen a falsa lenda de radicais de dereitas que perseguía os ingleses. Máis info e descarga aquí.

Panxoliñas e vilancicos revisited

Do mesmo xeito ca no s. XVIII, os compositores de música popular que normalmente desenvolven o seu traballo en castelán bótanse a facer panxoliñas en galego. Daquela, nun estertor aínda por estudar da escola trobadoresca, facían casar nas letras galileo con galego, Galilea con Galicia e Ourense con Oriente, entre outras cousas. Hoxe, Nadadora e Apenino, destacados representantes galegos no pop estatal, fan algo semellante, e titúlano, respectivamente, Escoita, a neve cae arredor, versión do Happy Xmas de John e Yoko, e Panxoliña para Nuna.

A primeira xa se pode escoitar en streaming, na páxina d’A Regueifa. Agora só queda desexar persistencia e que as suban en mp3, eh?, non si?, ;-). E velaquí os rapaces do IES Leiras Pulpeiro de Lugo, que cantan as de toda a vida, para descargar.

Podgalego

O costume de postear sons galegos, iniciado, que eu saiba, por Mariademallou en Casatlántica, polo programa e-music, de Cuac FM e polos Ouveos na noite de Zimmer103, hai xa ben máis de medio ano, está agromar pouco e pouco no blogmillo. Pouco despois destas primeiras mostras, nós, dende música pirateable en galego (emepegues.blogspot.com) comezamos a subir as edicións de Se descobres que a NASA che rouba os discos de cumbias, con algunha ca outra dificultade técnica. Hoxe en día temos en galego podcasts tan currados, por exemplo, coma as Chuzanews de Chuza.

Téndelos todos, e máis, en podgalego.org

More

Máis Alá

O portal Vieiros vén de pór en marcha un soportal de cultura ben interesante, Máis Alá. Polos contidos e polo espírito é altamente recomendable para os afectos da Cultura Pirateable en Galego, e xa figura entre as fontes obrigadas deste blog. Incorpora música e vídeo, un paso adiante imprescindible nun medio dixital, e o formato lembra vivamente o das bitácoras. Inclúe unha porcentaxe moi alta de contidos libres, e a imaxe do cabezallo fala por si soa.

Arraianos de balde

A revista Arraianos, feita dende Celanova, ten os seus exemplares para libre descarga no seu sitio. O máis recente, un monográfico sobre Celso Emilio Ferreiro, que logo se ha subir en pdf, ten unha calidade digna de mención: inclúe textos inéditos do poeta e mostras da súa correspondencia, ben reveladora e mesmo polémica, tamén inéditas até agora. Este número foi xa presentado en Celanova e Compostela. En datas próximas presentarase en Vigo.

More

Puta Miseria despídese

O grupazo vigués de punk rock-teatro Puta Miseria despídese do escenario. Foi o sábado, cun konzerto multitudinario no Anoeta de Vigo, onde, xunto c’O Leo i Arremecághona!!!, tocaron o seu repertorio enteiriño e mesmo fixeron un bis do seu himno Facha Kabrón. Son sete anos levando por Galicia o seu concepto do punk como espectáculo multimerda. Quédanos o seu material no sitio web do grupo e o resto dos proxectos dos seus membros: Essenzia de Lapo, o Centro Social A formiga, etc.

Tendes emepegués deles na nosa emepegueca, no primeiro botón da barra da dereita.

Lentellas por un tubo

Lentejas los Miércoles, grupo de punk do Grove, acaba de subir enteiriña a súa discografía en mp3 para a libre descarga. A música galega libre está de parabén. Cantan e inglés, francés, alemán, castelán e, como non, en galego. Velaí a súa visionaria O Ataque da Gaivota. Xa viñan subindo o seu material dende hai tempo, e mesmo participaron, con Vigozoo, no Certame da Canción do Verán en galego Apologhit, onde non quedaron nada mal.

Abaixo a Dentadura!

A Regueifa Plataforma vén de reeditar para libre descarga na Rede o mítico concerto de Voces Ceibes (Benedicto e Bibiano) da transición para arrecadar fondos para Santiago Álvarez, teórico e práctico galego do comunismo morto en 2002 que aínda habiamos reivindicar un chisco máis. O concerto está inzado de consignas e frases célebres do imaxinario revolucionario galego, dende “Galiza Ceibe, poder popular” ata o pinchacarneiro conceptual de Bibiano en Can de Palleiro, ese “Abaixo a Dentadura” que, coreado polo público, se convertía no unánime “Abaixo a Dictadura”.

More

Solidariedade co Sector Naval

O grandísimo Xosé Manuel Pereiro demostra, si home si, que tamén ten un pasado punki, coma case todo cristo neste país. Non el, vamos, senón Calidonia, con este vídeo de Radio Océano que subiu ao You Tube e que nos chega vía Chuza. Os problemas, así a todo, seguen. Será que temos que seguir sendo punkis?

Hei, hei! Resisteirei! Nena, somos coma o sector naval.

O Hevi sempre trae boas novas

A primeira nova deste remozado Música Pirateable en Galego é un disco non tan novo. Saíu antes do verán e asínao o cu máis inquedo do rap galego, o Hevi, baixo o nome de Malandrómeda. E o de cu non é gratuíto, porque un dos temazos que inclúe este Os estraños sempre traen malas novas é TáChovendoMerda, co que reincide na temática escatolóxica de himnos como Sangue de Sudre. O primeiro disco de rap galego de libre descarga, premendo no botón do Eject de cada cántiga.

More